"Ora usah Kang, kie tek jujuli bae." bakul rames ngrogoh sak ning ora nana receh. Kaki Parta ngomong maning," ngonoh inyong ikhlas ikih."
"Ya kesuwun Kang..."
Kaki Parta mbanjut bali ngumah. Nini Sal wis ngadang neng latar gasik, mapag bojone bali.
"Payu gasik Bapane...kue nggawa apa neng buntelan?"
"Lawuh nggo rika kie mbok urung matengan."
"Inyong uwis matengan kae njangan lumbu." nini Sal semaur karo mbukak buntelan sing di cangking bojone.
Wong sakeloron pada mlebu maring ngumah, nini Sal langsung sarapan karo lawuh sing Kaki Parta olih.
"Enak yoh Pa...pinter golih olah-olah kie." nini Sal ngalemi sing masak.
"Iya kue, inyong angger maring pasar ya mesti sarap neng kono, melas Yung deweke randa, bojone ngode puluhan tahun seprene ora bali."
"Kepriwe Pa...randa?! Ohhh...pantesan rika bungah angger maring pasar, mesti sarapan nang pasar, mangkate sengkud gasik jebule ana sing di pendeng neng pasar." nini Sal ora sida sarapan. Langsung menyat wisuh maring baskom.
"Rika kenang ngapa Yung...inyong lagi kandah bakul rames ditinggal bojone wis puluhan tahun, deneng rika dadi jengkel, lah salaeh inyong apa Yung?!"
"Ora usah api-api, rika pasar gasik padune pengin ketemu bakul rames sing randa kue mau mbok Pa...inyong ngerti siki, kenang ngapa rika angger wengi turune ngleder ora kena diganggu, jebule cokan tilik randa bakul rames." nini Sal tambah ndadrah. Kaki Parta bingung golih arep nerangna kepriwe.
"Mangsude rika apa, inyong turu ngleder merga ngawane kesel, ana nderes, ana nggolet suluh, sorene golet dagangan. Inyong ora ngapa-ngapa karo randane, inyong gur melas...rika esih begya ana sing mahalna, nah kae pahal dewek anake akeh." kaki Parta njelasna maring nini Sal sing wis kadung jengkel.
Kadang jujur nggawe lara, tapi nglomboni lewih gawe lara maning. Kaki Parta wis ngomong apa anane, ningen nini Sal swai (salah paham) penampaane.
Bersambung....
Dening (Penulis) : Umi Asmarani
Editor : Arbi Anugrah
Artikel Terkait
