"Iya Maa...kue sarap disit lawuh lodeh bung, jengkole neng baskom lincak kae." nini Rimek nidokna sarapan mbari nyuntek badeg maring waja pengindelan.
Kaki Tupon sarap dewekan neng risban jejer pawon, karo ndelengna bojone sing katon trampil ngurusi badeg.
"Jane inyong melas rika Yung, kawit tangi turu wis dikut lirene mung wengi be inyong cokan nggugaih...inyong ya gumun maju ngeneh malah maju doyan. Rika ya kayong tambah ngeneh tambah mloes dadi hawane pengin nggugaih rika bae." kaki Tupon ngomong neng batin mbari nyokot jengkol.
Nini Rikem wis rampung ngorogi pongkor, wis ngonclang rasane ayem gari tunggu geni tok jagong neng jengkok.
"Rika sih kalung karo gelange neng endi Yung."
"Tek benaih, mbok gawe iri wong sing weruh...mandaran anu udu tuku duite dewek mengko gawe panas wong."
"Kayong ora tau weruh ngaji tapi waras deneng rika...ya apik nek rika ndue pinemu pikiran kaya kue."
"Iya Maa...inyong ya pada bae menungsa sing ndueni sifat iri, drengki ya pengin pamer mbarang, tapi inyong krasa nek weruh wong anggon-anggon apik inyong pengin, dadi emase tek benaih bae."
"Ya bener kue, miki inyong liwat neng empere kaki Parta lagi pada gegoh adol gabah arep nggo tuku emas, angkane inyong arep ngaruh-ngaruih rika kon aja di nggo malah wis dicopot ya syukur."
"Oalah, miki esuk kaki Rasikun bolak-balik gawa grobag isi gabah jere anune nini Sal, adol gabah nggo bayaran sekoaeh Diwan jebule arep nggo tuku emas."
"Iya, miki nini Sal banene gemlundang neng pedangan."
"Maen kue wurungane rika." nini Rikem semaur mbari mlengos.
"Kue kan ganu, siki genah rika sing dadi bojone inyong, tresane inyong ya mung kanggo rika, ora nana wong liane maning." kaki Tupon mandan nggombal.
"Halahh ya mbuh inyong ora ngerti." nini Rikem ngesur geni karo canthung-canthung.
Editor : Arbi Anugrah
Artikel Terkait
