Nini Sal gemien dijodohna karo kaki Tupon, ning nini Sal ora gelem, milih kaki Parta sing wonge bagus gede duwur. Kaki Parta uga pegaweane nderes ning dadi bakulan kewan, ana wedhus, ana ayam, entog mbarang. Sejen karo kaki Tupon, nek bar nderes gari mangkat sawah, wong sambiane tani.
Apa penjalukane nini Sal meh keturutan, wong kaki Parta sering maring pasar angger lagi pasaran pasare. Pokoke telat ora kasembadan nini Sal kemrewek ya gemlundang. Kaki Tupon esih bersyukur ora sida karo nini Sal ning olih nini Rikem sing mandan rereb wonge, senajan cokan kemrewek ning ora kaya nini Sal.
"Rika maju ngeneh maju mloes malah Yung, kayong mencorong koh, pokoke ya begya inyong olih rika." kaki Tupon ngalem ben wadone ora jengkel.
"Ya mencorong angger ke sorot batre." Nini Rikem mesem njejeri kaki Tupon sing esih kemringet.
"Ngapa maning...arep tanduk esuk-esuk, inyong esih kesel, mengko ngawan bae angger gulane uwis mateng."
"Iih...rika tah pikirane ngeres bae, lah wong maring bojo ya pengin mandan lendotan mbok, kaya tangga anyar sing cokan pamer neng ngarepan umah kae."
Nini Rikem madakna karo tanggane sing dadi penganten anyar. Kaki Tupon milih meseme mbok nini Rikem jengkel mengko bengi ora diwei.
Bersambung....
Dening (Penulis) : Umi Asmarani
Editor : Arbi Anugrah
Artikel Terkait
