BANYUMAS, iNews.id - Cerita Banyumasan kali ini menceritakan tentang dua orang yang tengah ribut di pasar hewan. Keduanya adalah nini Sal dan kaki Parta. Keributan dipicu rasa cemburu nini Sal kepada kaki Parta.
Sebabnya adalah kaki Parta sering makan di warung yang pemiliknya cantik. Pada saat kaki Parta sedang makan, tiba-tiba nini Sal sudah berada di belakangnya. nini Sal marah sejadi-jadinya karena rasa cemburu. Semua orang di warung itu diam seribu bahasa.
Cerita Banyumasan kali ini berjudul 'Nyusul Pasar'. Jalan cerita Banyumasan ini bersambung setiap episodenya, dan tayang setiap Senin dan Kamis yang ditulis dengan menggunakan bahasa Ngapak.
Berikut jalan cerita selengkapnya seperti dirangkum iNews Purwokerto, Senin (14/7/2022):
Esuk kie nini Sal adus gasik, wis diniati arep nyusul kaki Parta maring pasar kewan. Pirang ndina bae ora teyeng turu enak merga cemburu. Kaki Parta wis mangkat gasik nggawa wedhus 2.
Nini Sal mlaku ngeciput, ngliwati umaeh kaki Tupon sing esih pada jagongan neng ngarep lincak.
"Jiann...rika lah kaya wong pacaran bae, kaya laron...esuk sore rantan-runtun bae." nini Sal mandeg sedela neng ngarap umaeh nini Rikem.
"Lha kon ngapa enggane, pongkor wis dilaroni, gari nuggu grimis mandeg mengko ramane mangkat nderes. Ngeneh mampir medang beneman budin disit kie." nini Rikem tawa mampir.
"Kesuwun Yu...inyong arep mangkat pasar nyusul Ramane." nini Sal mlaku maning.
Nini Sal ora waleh arep nginggeng bojone, isin mbok dadi omongan wong. Nini Sal gipyak mlaku maning karo payungan godong gedhang.
Satekane pasar nini Sal thilang-thileng nggoleti kaki Parta, nyucruk cut bakul wedhus. Nini Sal mandeg neng pinggir warung, merga weruh bojone njanggleng malang kering lagi nawakna wedhus siji maning sing urung payu.
Kaki Parta ora weruh bojone nyusul, merga nini Sal njanggleng sekang kadoan.
"Gari siji kon sepira kue Kang..." wong pasar takon maring kaki Parta.
"Ngonoh dituku bae sing penting inyong ora rugi, kena nggo muter maning Kang...weteng wis kencot deresan ya kudu dideres koh."
Sauwise ngenyang kaki Parta ngiyani, penting numpang ora ketang setitik.
"Arep langsung bali apa rika?"
"Arep sarap disit, mayuh pada sarapan bareng, neng bango kae..." kaki Parta aseng maring sing tuku.
"Kesuwun, inyong wis sarap gasik mau, wong mburi ngerti inyong arep golet wedhus."
Kranjange ditutup maning, ditinggal sarapan disit. Kaki Parta mlebu maring bango, neng njero wis ana wong lagi sarapan.
"Kayong mandan awan Kang, kie arep sarap lawuh apa." bakul ramese takon.
"Lawuh jangan disogi mendoan ya...banyune teh sing anget mandan panas, kayong wis ngelod kie wetenge." kaki Parta njagong neng bangku njejeri batir liane sing lagi sarap neng kono.
Nini Sal esih mencenger ndelengna bojone sing lagi mlebu warung rames. Atine gemlethek pengin banget mlebu njero warung.
"Kewenangan siki...rika ora bisa goroh maning maring inyong, rika mesti wirang ke dikep neng warung." nini Sal kedimik-kedimik mlebu maring warung.
Kaki Parta lagi sarap merga wis kencot pisan, ora ngerti ana bojone wis malang kerik neng mburine. Seuwise rampung sarapan nini Sal langsung bae ngecbrek.
"Oohh, kaya kie lagune rika yoh, angger pasar andon ndolani randa moblong neng pasar!"
Kaki Parta kaget seporete krungu swara bojone neng mburine.
"Rika sih lagi ngapa neng kene Yung..."
"Ora usah takon, ora usah api-api ora ngerti, gari waleh bae maring inyong nek rika lagi demenan karo bakul rames. Pirang ndina bae rika ngingkuri inyong, sing ana neng katonan mung bakul rames sing moblong-moblong."
Wong se warung pada meneng kabeh, bakul rames semono uga, kagete ora lumrah krungu ana wong wadon ngomong kaya kue.
"Jiaann...rika tah gawe wirang temen maring inyong Yung...inyong mangkat pasar rika esih turu, urung ana sarapan, wdhus payune wis awan inyong wis kencot Yung dadi mampir sarapan neng kene. Deneng rika tah dadi wong koh panasan temen atine, ngisin-ngisina inyong. Bali ayuh!!
Kaki Parta sing krasa isin dadi tontonan wong se warung, mbatan menyat nggered bojone metu sekang warung rames. Nini Sal mbedod bae ora gelem ngetutna kaki Parta metu.
Sing ndue warung mungg gedeg-gedeg tok ndeleng wong sakeloron pada gered-geredan tangan. Nini Sal wegah kalah, merga kae mergoki dewek pas lagi sarap neng warunge randa sing gawe cemburu.
Kaki Parta sing wirang, langsung bali, nini Sal ditinggal neng pasar kon bali dewek. Urusane mandan dawa kie mengko neng ngumah nini Sal gari di wulang.
"Inyong ora wedi rika, wong wis salah esih goroh bae, dasar wong lanang, karepe pengin bener bae."
Nini Sal bali mlaku ngetutna kaki Parta sing uwis ndisiti neng ngarep.
Bersambung....
Dening (Penulis) : Umi Asmarani
Editor : Arbi Anugrah
Artikel Terkait
