Cerita Banyumasan, Kisah Kehidupan Nini Rikem dan Kaki Tupon Episode 18: Tukang Togel

Butul ngumah wadone lagi gemlundang neng pedangan." Due bojo ora kanggo nggawe, pintere mung gawe anak tok clangkrak clingkrik pengine awan bengi, tapi anak ora teyeng ngempani!!"

Baca Juga

Sadewo Tri Lastiono Dikukuhkan Jadi Ketua Yayasan Amanah Nusantara Peduli

"Aja nangis bae Geng (Sugeng sapiane Kaki Trisno), inyong ruwing... nangis mengko ager bapamu bali. Beras be ora due semenir acan, ndadak bebek gaplek kie. Tinggal lunga bae karepe bojo kaya kaki Trisno tah." karo bebek gaplek mbari nggendong si ragil nini Tas kemrewek.

"Mbok...mboke..." kaki Trisno celuk-celuk sekang njaba.

"Esih kemutan umah bapane!!" semaur karo kesuh.

"Iya mboke, kie majikane inyong mung aweh semene tok, kena nggo becer rika." kaki Trisno ngelungna duit lewian nggo tuku ududan miki golih utang maring kaki Parta.

"Alhamdulillah...majikane wis bayar rika...deneng mung semene Pa..." nini Tas njembreng duite.

"Iya koh, jere separo disit kue, ngesuk angger aweh maning ya tek weken rika kabeh." kaki Trisno nglombo ben bojone mandeg golih kemrewek.

"Oh iya, ya kie Darwan cekel disit inyong urung teyeng adus kawit mau." nini Tas ngelungna si ragil maring kaki Trisno.

"Dasar wong wadon, diwei duit nembe gipyak adus, kawit mau rewad-rewod, pirang mbara bojo bali cemawis medangan karo bojo mesem. Pancen inyong ora ngayani ya trima diwei rewad-rewod gelem nglayani be begya. Mengko bengi angger nomere metu mangsa ora tek tukokna emas nana." kaki Trisno menyat karo nggendong Darwan.

Nini Tas adus melong garonan neng ngarep kaca lemari, katon bungah senajan mbuh diwei sepira, ora ketang dilomboni. 

"Pa... kae gapleke di rampungna, inyong arep maring warung, ora due lenga ora due apa-apa, ngledig-dig pedangane. Nemu dompet neng ngisor kampil isine mung buku ngimpi tok, mbuh kaya ngapa olih nomer. Pegaweane tah tukang masang nomer ningen duit be ora se penje acan, Pa...Pa..."

"Oalah... jarku adus arep aseng maring senthong malah kon bebek gaplek, Mboke...mboke...mengko bengi angger nomere metu patang angka, rika njaluk apa bae tek tukokna pokoke."

"Lha, rika ora weruh sih kae, Sugeng wis glangsaran jaluk jajan kawit wingi, rika lunga wingi nembe bali ya ora weruh anake glebeg unggal dina. Ora kober mikir aseng rika maring senthong, nunggu bocah pada turu mengke bengi ari sabar." 

Nini Tas ngemban Darwan mbatan lunga maring warung karo nuntun Sugeng sing glangsaran jaluk jajan.

Masalah neng jejodoan kue werna-werna, ningen babagan kurang duit sing nggo dadi penyebab bubare wong jejodoan. Sing pada ngertine, sing pada percayane, ben jejodoane langgeng.

Bersambung....

Dening (Penulis) : Umi Asmarani

Editor : Arbi Anugrah