Cerita Banyumasan, Kisah Kehidupan Nini Rikem dan Kaki Tupon Episode 3: Ora Waleh

Gara-gara wedi mbok ditinggal mbojo maning, nini Rikem ngurangi kemreweke. Awan kie malah kayong sejen, aleman, lendotan bae maring kaki Tupon. Mesti ana sing di karepake.

Baca Juga

Cerita Banyumasan, Kisah Nini Rikem dan Kaki Tupon Episode 45: Demenan

"Ramane...kaki Wardi kon dandan amben iloken gelem...kayong moni bae krakat-kreket isin maring anake Maa." nini Rikem esih lendotan ngrayu Ramane.

"Ya ngesuk-ngesuk inyong tek rasan kaki Wardi," semaure Ramane.

"Lha, deneng ngesuk-ngesuk...ya mengko bengi prei maning kie, inyong isin angger ambene moni Maa..." nini Rikem kayong mulai kesuh.

"Inyong kencot Yung, arep madang disit, ngeneh jikotna sega karo lawueh sisan."

Nini Rikem gupruk jiotna sega karo lawueh sisan. Bareng piringe wis kebeng disandingna neng ngarepe kaki Tupon. Nini Rikem ndelengna kaki Tupon sing lagi madang.

"Rika pancen pinter olah-olah Yung, jan sambel karo jengkol beweeh cocok banget, apa maning ana iwak ayame jann nylekamin pisan." kaki Tupon ngalem bojone. Nini Rikem menjap-menjep bungah pisan olah-olaeh di alem enak.

Nini Rikem ngejogna wedang teh neng cangkir, kaki Tupon langsung nyruput wedang teh. Lanjut maning jikot iwak ayam langsung dicokot.

"Lagi ora due duit deneng tukoni iwak ayam, Yung. Inyong tah wis ana sambel coel jengkol be wis nikmat."

"Kue mbok si Jalu, jengger adine si brontok." 

"Lah berati si Jalu dibeleh kie, deneng ora ngomong disit Yung...si Jalu wis dibayar neng kaki Arwin wingi bengi lagi inyong ronda...inyong ora due ududan dadi tek dol tapine si Jalu urung dijikot. Duit sing diweken rika lagi nang sawah kue bayarane si Jalu, inyong ngelong 20.000 nggo tuku ududan." kaki Tupon mandeg ora sida ngentongna madange.

Nini Rikem kaget mbanjur sewot, kesuh." Deneng Rika ya ora ngomong, angger Rika ngomong kue duit golih adol si Jalu ya inyong ora bakalan mbeleh." nini Rikem semaur karo nyincingna jarit mbari menyat.

"Inyong ora ngomong anu wis tek long nggo tuku ududan, mbokan diomeih Rika, angkne ngomong mengko angger wis genep 70.000." kaki Tupon nerangna ben bojone ora tambah ndadi jengkele. 

Tapine, nini Rikem wis kadung jengkel githir mlebu senthong nutup lawang.

"Braakkk!!!" suara lawang ditutup neng nini Rikem.

Kaki Tupon liren, wisuh neng baskom. Piringe esih ana isine separo, madange mbatan ora enak gara-gara gegoh iwak ayam.

Dening (Penulis) : Umi Asmarani

Bersambung....

Editor : Arbi Anugrah