Cerita Banyumasan, Kisah Kehidupan Nini Rikem dan Kaki Tupon Episode 11: Nginep Neng Hotel

"Ramane... ngeneh mlebu, kie sing nggo nganu apa miki yoh, jere Joko ana banyu angete metu dewek. Iloken di pejet apane miki." nini Rikem karo tal-tul kran sing neng njero kamar mandi.

"Inyong ora ngerti Yung, mbok bodol mengko ketempuan. Inyong tah ora melu-mely ngonoh."

"Lah wong lanang koh cemen temen rika tah, angger ora blajaran ya ora ngerti-ngerti mengko. Kie anu gelas koh neng njero kamar mandi, ana sikat karo odol cilike nggo sikatan ndean yoh Maa...kayane kran kie kudu di dengkek ben metu banyu angete."

"Iya ndean, aja cag-ceg kaya kue...mbok bodol. Ngonoh angger bodol udu ganing inyong tapi ganing rika" kaki Tupon kesuh merga nini Rikem apa bae dicekel.

"Bener kie, di tunyuk banyune metu, di dengkek maring ondol-ondol abang dadi anget banyune."

Wong loro pada gubes neng kamar mandi, Joko dodog-dodog lawang sekang njaba. Nini Rikem mbukakna lawange sekang njero, banjut Joko mlebu nidokna carane nggodog banyu karo teko listrik.

"Joko...kie anu alat apa ngethapel neng tembok kamar mandi..." nini Rikem celuk-celuk sekang kamar mandi.

"Oh, kue wadah sabun sisan nggo sampoan...nah kie hair dryer sing nggo nggaringna rambut angger rika bar sampoan." Jojo njelasna maring biyunge.

"Oh, ya yaa...inyong wis ngerti kabeh, nganah ari ko arep mlebu kamare dewek." nini Rikem katon kementhus, ning Joko ya gur mesem tok, genah biyunge dewek ya anu wis apal wateke. Senajan ngeyel, keminter ning anu cokan mandan bener.

Joko metu sekang kamare biyunge, mlebu kamare dewek. Nini Rikem langsung kemlithak arep adus dewek, kaki Tupon gur ndelengna tok ndeleng tingkah polaeh wadone.

Bersambung....

Dening (Penulis) : Umi Asmarani

Editor : Arbi Anugrah