Cerita Banyumasan, Kisah Kehidupan Nini Rikem dan Kaki Tupon Episode 5: Bali Ngumah

"Eh, rika deneng... ana apa sih kadingaren temen?" 

"Inyong lagi ronda Kang... kayong sepi biasane gubes karo ninine, amleng lagi maring ndi sih... bocahan ya amleng." 

Kaki Parjo tingak-tinguk goleti ninie.

"Biyunge lagi nginep neng umaeh adine, mangkat mau awan." 

Kaki Tupon nglomboni merga isin nek kandah apa anane.

"Oh, lagi due gawe apa Kang, kadingaren temen ninine gelem nginep."

"Iya, dasare ya sue ora dolan dadi pengin nginep." 

Kaki Tupon karo gemrendeng neng batin.

"Ndadakan tambah ndadrah golih takon kie wong."

"Si Joko kayong sue ora bali apa Kang, ora tau tumon." 

Kaki Parjo takon anake kaki Tupon sing neng Jakarta.

"Genah agi akeh gawean dadi arang-arang bali, kie jere arep bali tahun baru an mengko, bali sekelurga, nah si Risah ya sisan melu mumpung prei." semaure kaki Tupon.

"Oh, ya yaa... ya wis digawa ngaso wis esuk kie..." 

kaki Parjo menyat metu maring njaba.

Seuwise kaki Tupon nyengkolak lawang, banjur mlebu senthong mapan turu.

Esuke jeprut nini Rikem gipyak bali, kemutan kaki Tupon karo bocahan sapa sing ngadangna. Jengkela kaya ngapa wong arana bojo karo anak ya gawe ora teyeng turu. 

"Maa... ramane... kie inyong bali," 

nini Rikem celuk-celuk neng emper senthong.

Kaki Tupon sing nembe bae ngliyep kaget, kaya ngimpi.

"Rika bali Yung?"

"Iya kie, bukakna lawang mburi gagian."

Kaki Tupon metu sekang senthong, nini Rikem muter metung pedangan. Seuwise lawange dibukak nini Rikem mlebu maring ngumah. 

Editor : Arbi Anugrah