Cerita Banyumasan, Kisah Kehidupan Nini Rikem dan Kaki Tupon Episode 9: Plesir Baturraden

"Kacane buka bae, Joko...karo sing mambuu wangi neng mobil anu apa kie jann...gawe wetenge inyong nyel-nyelan."

"Oh ya, anu pewangi, ya ngko tek pateni AC ne ben ora mambu, rika ndelenge njaba sing seger mengko toli ora mabok maning. PPO ne di cekel bae di wedakna weteng karo gulu."

"Biyunge tah ndadakan mutah, ya mobile mambu senthonge rika kie, ana PPO ne." Paijo moyoki biyunge karo gayem jajan.

"Bocah maning sih, ujare mutah ke pengin sih, wong ijig-ijig mumbul sekang weteng koh." nini Rikem semaur ora trima.

"Ya wis, Paijo anu urung tau mabok ya ora ngerti rasane mabok." kaki Tupon ngedem-demi ben ora mbabrah wadone golih ngecebrek.

"Wis enggal butul ikih kie, dela maning. Nggawa jajan sing tuku miki bae Nok dadi neng kana mengko gur tuku sate kelincine. Mau ramane pengin sate kelinci jere, anu akeh ikih ngko golet neng nduwur." Joko wis mulai markir mobile.

Sauwise mudun sekang mobil, Joko ngejak maring pintu masuk kawasan Baturraden. 

"Hawane pada bae angger neng sawah esuk-esuk yoh Yung...adem akeh pedhute." Kaki Tupon njanggleng deleng pemandangan sekang nduwuran.

"Iya...mung bedana neng kene akeh bakul werna-werna Yoh Maa..." nini Rikem mereki Ramane.

"Foto-foto disit ya Yung...pada kumpul dadi siji mengko gantian." Risah ngatur rama biyunge kon pada foto bareng-bareng.

Wis rampungan foto nembe pada mlebu maring kawasan wisata, Risah mlaku neng ngarep karo nuntun biyunge mbok kepleset. Kaki Tupon kaya lagi angon keluwarga, rasana bungah bisa kumpul plesir bareng. Semono uga Joko, rasa bungaeh ora bisa diucapna karo kata-kata nyawang wong tua esih pada sehat. Bungaeh wong tua, bungaeh anak.

Bersambung....

Dening (Penulis) : Umi Asmarani

Editor : Arbi Anugrah