"Ya aja kaya kue Bapane...aja lunga, kae pongkore wis di laroni koh." nini Sal ngetutna kaki Parta metu.
"Ora, inyong wis kesel urip karo rika, ngonoh karepe rika bodoa."
Kaki Parta sing wis kadung kesuh, mlaku terus ora ngrungokna nini Sal sing mlayu nguber karo kemrewek. Neng ndalan papagan karok kaki Tupon bali nderes karo mikul pongkor sing kebek isi badeg.
"Lagi pada apa-apaan sih kue uber-uberan, ora isin ditonton tanggane kaya kue." kaki Tupon mbendok kaki Parta kro nini Sal.
"Kae Kang...bapane lagi demenan karo wong ora gelem ngakoni." semaure nini Sal gawe atine kaki Parta tambah medegel. Barang ora nyata koh di kandah-kandahna maring wong.
"Plaakkk...plaaakk!!" kaki Parta nampong pipine nini Sal kiwe nengen.
"Aja kaya kue, mandeg...sing aso, aja pada antem-anteman neng dalan. Bali ngumah bae maning, aja karo kesuh kaya kie. Aja ngasih tangan temandang, ora kena...wong jejodoan kue akeh cobaane, bali disit ayuh." kaki Tupon ngedunna pongkor misah antara wong sakeloron kue.
"Dasar wong wadon ora nana ngertine, saben ndina mung isine gela ora nana santrane. Inyong kesel Kang ngurusi wong wadon kaya kue. Inyong dodolan wedhus ya duit bruk kabeh koh malah nuduh sing ora-ora, apa inyong ora kesuh."
"Bapane ora gelem waleh, unggal maring pasar mesti sarapan neng warunge nini randa Kang..." nini Sal esih nyrengkeng.
Kaki Tupon aseng kon pada bali maning aja gegoh neng ndalan. Nini Sal nyekeli pipi karo nangis, kaki Parta ngetutna kaki Tupon.
Kaki Tupon ninggalana pongkore neng dalan jujugna kaki Parta karo nini Sal bali ngumah. Nini Sal wis ora kemrewek maning trut dalan, mlaku ngetutna kaki Tupon.
Kabeh wong wadon ndueni rasa cemburu, ningen cemburu ora nana asal usule ya arane cemburu buta. Di rampungna bareng karo pikiran sing adem ben ora tambah ndadrah.
Bersambung....
Dening (Penulis) : Umi Asmarani
Editor : Arbi Anugrah
Artikel Terkait
