Cerita Banyumasan, Kisah Kehidupan Nini Rikem dan Kaki Tupon Episode 2: Nambah Bojo

Nini Rikem esih kemrewek neng mburitan." Saben dina kesel, esuk wis uplek neng pedangan, neng sumur kumbahan kebek se ember ketemu dewek urung ana sing ngrewangi, urung Ramane ager wengi sering gugaih."

Baca Juga

HIPMI Banyumas Gelar Fun Mini Soccer Tournament

Kaki Tupon dehem," He em...rika pengin ana sing rewangi Yung...ya ngko tek goletna, dadi rika ora kesel dewekan. Aja gemrungsung bae, ngurus anak bojo kue sing ikhlas Yung...Inyong ya pada bae kesel ikih, ana ngurus sawah, ana ngarit, ana nderes ya kudu ketemu dewek."

"Iya Ramane...genah kesel nyatane ya kemrewek." nini Rikem semaur maning karo mlaku mlebu nyangking ember.

"Angger rika kesel ngurus umah karo bocahan ngko inyong tek nambah bojo maning dadi pegaweane rika ana sing ngrewangi." Kaki Tupon menyat sekang dingklik nyawel tudung karo pacul mbanjur metu ngumah.

Baca Juga

Dukung Program Presiden Prabowo, Polresta Banyumas Tebar 20 Ribu Ikan di Baturraden

"Braakkk!!!" swara ember pecah dibanting neng nini Rikem.

"Ramaneeeee...deneng rika kaya kue maring inyong?" nini Rikem njerit, tapi kaki Tupon wis metu njaba ora ngrungokna nini Rikem ngomong apa.

Nini Rikem jagong neng risban ngarep pawon, elueh ruwean. Omongane kaki Tupon wis nglarani atine nini Rikem.

"Apa rika wis ora tresna maring inyong maning Ramane, apa rika wis due demenan maning selain inyong. Inyong kudu kepriwe, wong genah kesel ya ngeluh. Mol omongane rika miki temenanan Ramane..." Nini Rikem ngomong dewek disauri dewek.

Awane nini Rikem gawe lawuh enak, adus kramas sampoan, rambute digaroni di rembyak karo pepe neng ngemper garingna rambut. Gara-gara omongane kaki Tupon mau nini Rikem katon sejen.

"Mbok Ramane ngasih mbojo maning, inyong kudu rubah, aja kemrewek bae, arep dandan isin, sing penting tapih ganti unggal dina, klambi ya sing resik."

Bar pepe rambute wis garing terus digelung, nini Rikem mlebu ngumah, ora kanti sue kaki Tupon bali sekang sawah. Kaki Tupon mentheleng ndeleng nini Rikem baene sejen ora kaya biasane.

"Mempan kie omonganku mau esuk wkwkwkk..." Kaki Tupon ngomong neng batin.

Nini Rikem mesem weruh kaki Tupon bali. Tudunge ditampani di canthelna neng paku, slepane didelah neng cangkok.

Penulis : Umi Asmarani

Editor : Arbi Anugrah