Cerita Banyumasan, Kisah Kehidupan Nini Rikem dan Kaki Tupon Episode 6: Anake Akeh

Kaki Tupon melu udu omong mbok menawa dinggo nini Rikem.

"Kayong wulan kie ora pada kirim, apa arep sida pada bali ya...genah kiriman wingi nggo nglebokna sekolah Paijo, kebutuhan ya werna-werna. Sawah wragade gede, udan bae gulane ya gemblung. Ora usah jaluk anak lah, nek lagi omber mestine bocah pada ngirim duit Maa...aja ngriwuki anak." 

Nini Rikem semaur karo kekes-kekes pedangan.

"Ya wis bodoa rika Yung, wis mateng sih kie sarapane..." 

Kaki Tupon mereke meja sing isi sarapan.

Jangan lompong karo pecak jantung esih kebul-kebul, segane menul-menul, wong sega angian ( nasi yang di kipasi ).

Kaki Tupon ndiker sarapan, banene ngasih ana swara atob. Nini Rikem bungah ndeleng kaki Tupon sarapan katon enak. Paijo mlebu ngumah karo mangad-mungud.

"Rambute inyong dadi kaku, pada ngadeg jalaran sampoan sabun dulit kie Yung."

"Ya mengko sore tuku angger bali adol gula, si Denok kon rikat-rikat emper kae Jo...bocah wadon aja kebluk. Kudu rajin resik-resik dadi olih bojo bagus ora rewad-rewod kaya biyungmu kie gemien sregep rikat-rikat, sregep apa bae."

"Deneng biyunge olih ramane udu wong bagus." 

Paijo semaur neng sandinge ramane.

"Huussst, bocah koh saru...ko bagus sih ujare sekang endi udu sekang winieh ramane." 

Kaki Tupon semaur karo nabok bokonge Paijo.

Paijo sejen karo kakange, bocaeh mandan rewel kaken polah. Si Joko lah bocaeh manut, sekolah ya olih bea siswa terus ora tau mbiaya. Kuliah ya mlebu ITB, nini Rikem karo kaki Tupon bungah bisa nyekolahna anak tekan duwur. Kepengine wong tua anak aja ngasih rekasa kaya wong tuane.

Paijo mleret mlebu maring senthong, kaki Tupon karo nini Rikem pating jegigis pada ngguyu.

Anak ndelengna ya ngrungok apa sing diomongna wong tua, aja nyalahna kelakuan anak tapi nylinguk maring awake dewek. Aweh conto sing apik supaya anak bisa niru.

Bersambung.....

Dening (Penulis) : Umi Asmarani

Editor : Arbi Anugrah